راچڵەکین-
ململانێی نێوان ئێران و ئەمریکا ئێستا لە بارودۆخێکی مەترسیداری چەقبەستوودایە.
مەترسیدارییەکە لەو ڕووەوەیە کە هیچ کام لە لایەنەکان متمانەی بەوەی تریان نییە؛ ئێران لە ئامادەباشیدایە و پێیوایە دۆناڵد ترەمپ تەنها بۆ کاتکوشتن ئاگربەستی ڕاگەیاندووە تاوەکو هێرشێکی کتوپڕ ئەنجام بدات.
ئەم بارودۆخە چەقبەستووە، چونکە ئێران ئامادە نییە بچێتە ناو هیچ گفتوگۆیەکی ئاشتییەوە تا ئەو کاتەی گەمارۆ دەریاییەکەی ئەمریکا بەردەوام بێت. بۆیە سەرەڕای درێژکردنەوەی ئاگربەست بۆ کاتێکی نادیار، دۆخەکە هێشتا بۆ هەموو لایەنەکان بە نالەباری ماوەتەوە.
گەرووی هورمز ئێستا بۆ هاتوچۆکردن تا ئاستێکی زۆر نائارام بووە و تەنها ژمارەیەکی کەم کەشتی لێیەوە تێدەپەڕن. بەلەمە چەکدارەکانی ئێران تەقەیان لە کەشتییە تێپەڕبووەکان کردووە و ئەمریکاش دەڵێت هێزەکانیان زیاتر لە 20 کەشتییان گەڕاندووەتەوە کە بەرەو بەندەرەکانی ئێران دەڕۆیشتن.
ئەنجامی ئەم بارودۆخە، زیانێکی کوشندەیە هەم بۆ ئێران و هەم بۆ ئابووری جیهانی.
هەرچەندە ئەم ڕووبەڕووبوونەوەیە درێژە بکێشێت، کاریگەرییەکانی لەسەر ئابووری جیهان سەختتر دەبێت و مەترسیی ئەوەش زیاد دەکات کە پریشکێک ببێتە هۆی هەڵگیرسانەوەی جەنگێکی گشتگیر لە کەنداو؛ جەنگێک کە ڕەنگە بە هێرشی ئەمریکا بۆ سەر وێستگەکانی وزەی ئێران و وەڵامی تۆڵەسەندنەوەی ئێران بۆ سەر وڵاتانی عەرەبی دراوسێی لە ناوچەکەدا دەست پێ بکاتەوە.
ئەمە خراپترین قەیرانە کە ناوچەی کەنداو بە خۆیەوە بینیبێت لە دوای هێرشی عێراق بۆ سەر کووەیت لە ساڵی 1990دا.
BBC