راچڵەكین -

تادێت ژمارەی قوربانیانی ئەو لافاوە وەرزییەی كە چەند ناوچەیەكی پاكستانی گرتووەتەوە، بەرزتردەبێتەوەو بەپێی ئامارە فەرمییەكانی ئەو وڵاتە، لە رۆژی 26ی حوزەیرانەوە تا ئەمڕۆ یەكشەممە، 97 كەس بەهۆی لافاوەوە گیانیان لەدەستداوە و نزیكەی 300 كەسیش بریندار بوون.

ئەمڕۆ یەكشەممە 26-7-2026، دەسەڵاتی بەڕێوەبردنی كارەساتەكانی پاكستان، لە راگەیەندراوێكدا بڵاویكردەوە، بەهۆی ئەو لافاوەی كە لەئەنجامی بارانبارینی بەخوڕی وەرز زۆرێك لەناوچەكانی وڵاتی گرتووەتەوە، بەشێك لە شاری گوجرانوالا لە باكووری رۆژئاوا ژێرئاو كەوت و زیانێكی زۆریش بەر ماڵی هاووڵاتیان وژێرخانی شارەكە گەیشت، هاوكات زۆرێك لە دانیشتوانی شارەكەش ناچار بوون ماڵ و ماڵیان جێبهێڵن.

بەگوێرەی نوێترین ئاماری دەسەڵاتی بەڕێوەبردنی كارەساتەكانی پاكستان، لە سەرەتای دەستپێكردنی بارانبارینی وەزری لە 26ی حوزەیرانەوە تا ئێستا، 97 هاووڵاتی گیانیان لەدەستداوە و 297 كەسی دیكەش بریندار بوون، زۆربەی قوربانییەكانیش لە هەرێمی خەیبەر پەختونخوا لە باكووری ڕۆژئاوای ئەو وڵاتە تۆماركراون، چەندین قوربانییش لە پارێزگای پەنجاب لە باكووری ڕۆژهەڵات تۆماركراون.