راچڵەكین -

هێزەكانی دژەتیرۆر تیرۆریستێكی داواكراو لە سنووری پارێزگای سلێمانی دەستگیر دەكەن، كە بەشداریی لە چەندین كردەوەی تیرۆریستی و شەڕی دژ بە هێزە ئەمنییەكان كردووە.

ئەمڕۆ یەكشەممە 11-10-2026، بەڕێوبەرایەتیی گشتیی دژەتیرۆر، لە راگەیەندراوێكدا بڵاویكردەوە، هێزەكانی پاڵپشت بە زانیاریی هەواڵگریی ورد و بەدواداچوونی بەردەوام، توانیان تیرۆریستێك لە ناوچەی باینجان-ی سنووری پارێزگای سلێمانی دەستگیر بكەن.

تیرۆریستە دەستگیركراوەكە ناوی (حكم ردام محمد الرفیعی) ناسراو بە (ابو الحكم)، خەڵكی پارێزگای سەڵاحەدینە و چەكداری ڕێكخراوی تیرۆریستیی دەوڵەتی ئیسلامیی بووە لە فرقەی (ژات الصوار)ـی لیوای (عەبدوڵای كوڕی عومەر)، بەشداری چەندین كار و چالاكی تیرۆرستی و شەڕی دژ بە هێزە ئەمنییەكان كردووە، دوای ڕووخانی دەوڵەتی ئیسلامی هاتووەتە سنوری پارێزگای سلێمانی و لە ناوچەی باینجان نیشتەجێ بووە.

دژەتیرۆر ئاماژەی بەوەكردووە، تیرۆریستەكە فەرمانی دەستگیركردنی هەیە لەلایەن دادگای لێكۆڵینەوەی نەینەوا بە ماددەی 4ـی تیرۆر، دەستبەجێ پاش دەستگیركردنی ڕادەستی یاسا كرا بە مەبەستی سزادانی.