نیشانه‌ و چۆنیه‌تی چاره‌سه‌ری وەستانی سوڕی مانگانەی خانمان

تەندروستی

پێش 4 هەفتە     ژمارەی بینراو 193

نیشانه‌ و چۆنیه‌تی چاره‌سه‌ری وەستانی سوڕی مانگانەی خانمان


ڕاچڵه‌كین-

ئافرەتان لە دوای تەمەنی 48 ساڵی بە زۆرینە هەست بە نیشانەكانی نەمانی سوڕی مانگانە دەكەن، تەمەنەكە جیاوازی هەیە لە ئافرەتێك بۆ ئافرەتێكی تر بەس بەگشتی لە نێوان ساڵەكانی 48 بۆ 50 ساڵی تەمەن دەوەستێت، دكتۆر عه‌زیز پسپۆری ووردی شەكرەو ڕژێنەكان هۆڕمۆنات نیشانه‌ و چۆنیه‌تی چاره‌سه‌ری ئه‌م حاڵه‌ته‌ ڕوون ده‌كاته‌وه‌.

سەرەتای نیشانەكانی بەكەم بوونەوەی یان ناڕێكی سوڕی مانگانە دەست پێ دەكات، كە زۆربەی ئافرەتان سەردانی پزیشكی پسپۆڕی ئافرەتان دەكەن بەناوی خوێن بەربوونی ئافرەتان، بەڵام لەڕاستیدا سەرەتای وەستانی سوڕەكەیە، زۆر جار بۆ ماوەی شەش مانگ یا ساڵێكـ دەوەستێت، پاشان بۆ چەند مانگێك دەگەڕێتەوە بەر لەوەی بە یەكجاری بوەستێت.

نیشانە باوەكانی جیا لە نەمانی سوڕی مانگانە ئەمانەن : هەست كردن بەگەرم داهاتنی لەش و ئاڕەقە كردنی زۆر و لەناكاو، زۆر جار ئەو هەستە گەرمییە تەنها لە سەر و سینگ دەبێت یا هەناسە دەگرێت و پاشان نامێنێت، دڵەكوتە و زوو هەڵچوونی دەروونی، یان شلەژانی دەروونی، كەم خەوی لەشەواندا، فڕێدانی بەتانیەو جوڵاندنی پێیەكان، هەستكردن بە تەزین و نارەحەتی قاچەكان و جەستە، بێ هێزی لەش، تەنانەت زۆر جار پاڵەپەستۆی خوێن زیاد و كەم دەبێت، واتە بەشێوەیەكی راستەڕێ نایبینی، زیاد بوونی كێش و زیادی كرش و زوو هەوكردنی میزڵدان و ڕێرەوی میزەڕۆ، زۆر میز كردن و ووشك داهاتنی زێ و دەرچەی زاوزێی ئافرەتان و كەم بوونەوەی ئارەزووی سێكس و ئازار لەكاتی جووت بووندا.

بۆ ئەو نیشانانە بەتایبەتی لە كۆمەڵگەی خۆمان چەندینجار سەردانی نەخۆشخانە دەكەن و زۆر جار بەداخەوە بە گرانەتاو تای ماڵتە دەرمان دەكرێن و چەندینجار دەرزی دەرمانی ئەو نەخۆشیانە وەردەگرن.

جیا لەو نیشانەی باسمان كرد وەك ماكەكان لە پاش كەم بوونەوەی هۆڕمۆنی ئیسترۆجین پڕۆجیسترۆن لە ئافرەتان، ئەگەری تووشبوونیان بەنەخۆشی دڵ زیاد دەكات، كەمبوونەوەی چڕی ئێسك‌و شكان بەئاسانی، لەبیرچوونەوە و خەمۆكی.

چۆن دەست نیشان بكەین:

سەرەتا بە بینینی نەخۆش و باسكردنی نیشانەكانی، گرنگیدان بە دڵ و وەرگرتنی ڕێژەو چۆنییەتی لێدانی، پاڵەپەستۆی خوێن، ئەنجامدانی شیكاری هۆڕمۆنی و سۆنارو چڕی ئێسك و هەندێ شیكاری خوێنی تر لەكاتی پێویست.

چارەسەر بە شێوەیەكی گشتی دوو جۆرە:
یەكەم: چارەسەری هۆڕمۆنی كە بتوانی هۆڕمۆنەكانی ئسترۆجین و پڕۆجیسترۆن یان بەس ئیسترۆجین بدەی بە ئافرەت بە شێوەی مانگانە، بۆ كەم كردن ونەمانی نیشانەكان، كە زۆر بەسوود و كاریگەرە، بەڵام زۆر جار ئەو هۆڕمۆنانە لەو تەمەنە زۆر ماكی لاوەكی دروست دەكات، كە وامان لێ دەكات دەستكراوە نەبین لە بەكار هێنانی بەتایبەت لە كۆمەڵگەی خۆمان، لە هەموویان گرنگتر زیادبوونی ڕێژەی شێرپەنجەی مەمك و هێلكەدانە، لە ئەگەری نوسینی ئەو هۆڕمۆنانە پێویستە زوو سۆنارو تیشكی مەمك و هێلكەدان ئەنجام بدرێت، بۆیە ئەو جۆرە چارەسەرە لەلای ئێمە گونجاو نیە بۆ هەموو نەخۆشێك.

دووەم: چارەسەری ناهۆڕمۆنی ئەویش بریتییە لە :
- پێدانی پێكهاتەی نیمچە ئیسترۆجینی(فایتۆیستەر)، كە زیاتر لە پێكهاتەی خۆراكی دروستكراوەو زۆر باوە لە هەموو جیهان، نیشانەكان كەم دەكاتەوە، بەڵام تا ئێستا داتای زۆر لەبەر دەست نیە كە بسەلمێنێ كاریگەری لاوەكی هەیە بەتایبەتی زیادبوونی ڕێژەی شێرپەنجە، بەڵام بە شێوەیەكی گشتی سەلامەتن.

- پێدانی دەرمانی پتەو كردنی ئێسك وچڕی ئێسك بەتایبەتی كالسێۆم و ڤیتامین دی، بیس فۆس فۆنەیت كە گروپێكی تایبەتی چارەسەری كەم بوونەوەی چڕی ئێسكە.

- پێدانی دەرمانی هێوركەرەوە و نوستن لە شەودا كە گرنگە.

- وەرزشی بەردەوام .

داگرتنی ئەپی راچڵەکین بۆ ئەندۆرید

داگرتنی ئەپی راچڵەکین بۆ ئایفۆن