کەمپینی ناوی من ناوی دایکـمە و چەند سەرنجێک

ئارەزوو مەحمود


پێش 3 هەفتە

١- پرۆژەکە ھاتە پەرلەمانی عیراق و لەلایەن لیژنەی ژنان و خێزان و منداڵان  ئیشی لەسەردەکرێت و چەند سیمینارێکیشی بۆ رێکخرا لەناو پەرلەماندا و لە قۆناغەکانی سەرەتاییدایە .

٢- بەشێوەیەکی سەرەکی بۆ ئەو منداڵانەیە کە باوکیان نادیارە بەھەر ھۆکارێک بێت وەک منداڵەکانی پاشماوەی شەری داعش ، یان ئەو منداڵانەی دایکیان عیراقیەو باوکیان ئەجنەبیەو جنسیەی عیراقی نیە یانیش ئەو منداڵانەی کە لە ئەنجامی دەستدرێژی سێکسیەوە ھاتونەتە دونیا و ...ھتد .

 ٣-  پرۆژەکە گشتگیرو ئیجباری نیە.

٤- پرۆژە یاساکە مافی خوێندن و چارەسەری پزیشکی و مانەوەو سەفەرو سەرجەم مافە دەستوری و یاسایی و ئاساییەکە دەگەرێنێتەوە بۆ ئەو منداڵانە کە تا ئێستا بە ھۆی نەبوونی ناسنامە بێ بەشن لەھەموو مافێکی ھاووڵاتی بوون . 

٥- پرۆژە یاساکە دەکرێت بە ھێزتر بکرێت لەرووی ناونیشان و دارشتنی ناوەرۆکەکەیەوە لە رێگەی کەسانی یاسا ناس و  شەرع زان و پسپۆرو شارەزا لە بوارەکەدا.

٦- پرۆژە یاساکە تا ئێستا لە گەڵاڵە کردندایەو پیویستی بە پاڵپشتی زیاتری یاسایی ھەیە لە رێگەی پلانێکی تۆکمەو کۆرو سیمینارو بانگھێشتکردنی کەسانی پسپۆر نەوەک ھەڵای راگەیاندنی بێ بنەماو ھات و ھاواری سۆشیال میدیا .

٧- پرۆژەکە دژایەتی کردنی دین و ئاین نیە وەک ئەوەی بە ھەڵە لێکدانەوەو شیکاری بۆدەکرێت لای ھەندێک .

٨- پرۆژەکە دژی رەگەزی نێرو باوک نیە بەڵکو نەگوجاوی ناونیشانە  و رێگای ئیشکردن لەسەری وێنە راستەقینەکەی شێواندوە.
 
٩- دەکرێت ئەو دایک ومنداڵانەی بونەتە قوربانی بەشداریان پێبکرێت لە پانێڵەکان و راستەوخۆ رایان وەربگیرێت تا خەم و ئازارەکانیان بکرێتە یاسا و ھاووڵاتیان  راستەوخۆ بەرکەوتەی کارەساتەکان و ئازارەکانیان ببینن تا وێنەکە رونتربێت بۆ تێگەیشتن. 

١٠-  مەرج نیە ھەر ئیشێک رێکخراوەکانی ژنان پێی ھەستان دژی پیاوان بێت .

١١- ئەم پرۆژە پێویستیەو بە خۆشی و ناخۆشی من و تۆ نیە ، بەڵکو کێشەیەکی واقعی ھەیەو پێویستە بە یاسا چارەسەر بکرێت و داتاکان ترسناکن لە عیراق بەداخەوە. 

 ١٢- ھیوادارم ھەرکەسێک خۆی بەخاوەنی پرۆژەکە بزانێت و بەرلەوەی لێکدانەوەی نادروستی بۆ بکات ھەوڵبدات لە ناوەرۆکەکەی تێبگات و بە سەرنج و پێشنیازەکانیان بابەتە دەوڵەمەندترو بەھێزتر بکەن.


ئارەزوو محمود 
ئەندامی پەرلەمانی عیراق
٢٠٢١/٩/٢