عیماد ئەحمەد

ناوەڕاستی  مانگی دووی  1999  وەكو وەفدێكی یەكێتی  بە سەرۆكایەتی كاك كۆسرەت و ئەندامێتی  كاك سەعدی و كاك بەهرۆز  گەڵاڵی كە ئەوكاتە نوێنەری یەكێتیی نشتیمانی بوو لەگەڵ بەندە لە تاران بووین، مەبەستی سەردانەكە پەرەپێدانی پەیوەندییەكانمان بوو  لەگەڵ كۆماری ئیسلامی ئێران و هاوكات سەردانی لایەنە شیعەكان و باڵیۆزخانەی هەندێ لە وڵاتانمان كرد، لەوانە بالێۆزخانەی توركیا بوو لە تاران.

 سەرلەبەیانی  رۆژی (15/2/1999)  خۆمان  ئامادەكرد بۆ سەردانی بالیۆزخانەكە و كۆبوونەوە لەگەڵ بالیۆز، لەو سەروبەندەدا كاك بەهرۆز گەڵاڵی هەواڵ و دەنگۆی  دەستگیركردنی سەرۆك عەبدوڵا ئۆجەلان-ی  لە نایرۆبی پایتەختی كینیا  پیراگەیاندین كە ئەو  لە هەندێ سەرچاوەی بیانی  وەریگرتبوو، ئەو هەواڵە هەموومانی تووشی شۆك كرد و  نیگەرانی كردین. لەو ساتەوەختەدا هەزاران پرسیار و قوڵ لەیەك كاتد  دەهاتن و دەچوون، ئایا دۆخی كورد لە توركیا چی بەسەردێت؟  دوای ئەمەش مەسەلەكە و چارەنوسی ئۆجەلان بە كوێ دەگات ؟!

رێكەوتەكە زۆر ئاڵۆز بوو بۆ ئێمە، بەتایبەت لە خۆمان پرسی، ئایا بچین بۆ ئەو كۆبوونەوەیە  یان نا؟ كاك كۆسرەت بێ سێ و دوو، وتی: با بچین و كۆبوونەوەی خۆمان بكەین و بزانین چی رویداوە!؟
 لە كات و شوێنی كۆبوونەوەكەدا ئامادە بووین، سەفیر و چەند دیپلۆماتكارێكی تورك لە لایەك دانیشتبوون و ئێمەش لە لایەك، ژووری كۆبوونەوەكە هۆڵێكی گەورە بوو، پەنجەرەكانی گەورە و بەرز بوون، دیوار و ئەرز و پەردە و كەرەستەی ناو ژوورەكە رەنگی قاوەیی كاڵ بوو.

دوای نزیكەی  سەعاتێك لە دەسپێكی كۆبوونەوەكە، كارمەندێكی سەفارەت هات و قسەیەكی بە گوێی سەفیردا چرپاند، سەفیر ڕوخسەتی خواست و بە دوایدا رۆیشت، كاتێك هاتەوە وەكو تاوسێكی لەخۆبایی، سەر مەستی سەركەوتنی پرۆسەی گرتنەكەی ئۆجەلان  بوو، هەر بەپێوە وتی: ئۆجەلانمان دەسگیركردووە، ئێستا لە ناو فڕۆكەدایە بەرەو ئەنكەرە دەیهێنن. هەواڵەكە بۆ ئێمە و هەموو كوردێك شۆكهێنەر بوو، ئۆجەلانێك لە كاروانی خەباتی خۆیدا گەیشتە خاڵێك كە ئەو هەموو دنیا پان و بەرینە جێگەی ئەوی تێدا نەبوو، بەو هەواڵە ئەوان رۆژی شاییان و مەست و حەیرانی گرتنەكەی بوون، ئێمەش خەفەتبار و تووشی حاڵەتێكی سەیر بووین، لە ناخدا سووتاو و لەدەرووندا نارەحەت و پر حەسرەت و قین، هەر كە سەفیر هەواڵەكەی بە ئێمە وت، یەكسەر كاك كۆسرەت هاتە دەست وەك ئەوەی كەوتبینە كەمینێكەوە و بە ئازایی دەستبكاتەوە، بە شێوازی زیرەكانەی خۆی وتی بە گرتنی ئۆجەڵان كێشەی نێوان كورد و توركیا چارەسەر نابێت، بیر لە چارەسەركرنی ئاشتییانەی مەسەلەی كورد بكەنەوە.

بەم دەربڕین و هەڵوێستەی كاك كۆسرەت، وەك ئەوەی ئاوی سازگاری چیای هەڵگوردی كردبێتە گەرومانەوە و ساردی  كردبینەوە.  

كۆبوونەوەكەمان بە ساردیی  كۆتایی هات و گەڕاینەوە  هۆتیل، هەمووشمان دەستخۆشیمان لە كاك كۆسرەت كرد، بۆ ئەو هەڵوێستە جوامێر و مەردانە كەم وێنەییە. 

لە گەرانەوەمان بۆ وڵات و لە كۆبونەوەی مەكتەبی سیاسی هەموان دەستخۆشییان لە كاك كۆسرەت كرد، بەتایبەتی مام جەلال وتی؛ هەر ئەمەش لە كاك كۆسرەت چاوەڕوان دەكرێت.

ئێستا دوای نزیكەی(26) ساڵ، پرۆسەی ئاشتی بۆ چارەسەركرنی كێشەی كوردستانی باكوور هاتۆتە ئاراوە بە بەشداریی راستەوخۆی عەبدوڵا ئۆجەلان و توركیا، ئەمەش خۆی لە خۆیدا دەرفەتێكی زێڕینە بۆ چەسپاندنی ئاشتی و ئاوەدانی و برایەتی لە ناوچەكەدا.

هەموومان ئەو راستیە دەزانین چارەسەركردنی ئاشتییانەی كێشەی كوردستان لە هەر چوار پارچەی كوردستاندا  بیرۆكەی مام جەلال بووە.

بۆیە پێویستە هەموومان پشتیوانی پرۆسەكە ببین و ببین بە بەشێك لە چارەسەر لە پێناو ئاشتی و ئازادی و مافی گەلی خۆمان و  گەلانی ناوچەكە.

 سەد حەیف و مەخابن ئێستا كاك كۆسرەت لەبەر باری تەندروستی تاڕادەیەك دوورە لە مەیدانی كاری سیاسی، بەڵام ئەو وەڵامەی لەساتەوەختی گرتنی ئۆجەلاندا لە رووی باڵیۆزی توركیا كردی، بۆ ئەو كات و ئێستاش هەر راستە چونكە دواجار دەركەوت توندو تیژی و چەك هەرچەندە رەواش بێت ناگاتە ئامانجێك كە خزمەتی دۆزی رەوای میللەتەكەمان بكات، بۆیە پێویستە ستراتیژی كورد لەم سەردەمە تازە و پڕ گۆڕانكارییەدا، ئاشتی بێت، هەروەها دامەزراندنی سیستمێكی سیاسی و ئەمنی هاوبەش و دادپەروەرانەی هەموو گەلانی ناوچەكە بێت، كە زامنی ماف و داخوازی كورد بكات وەكو گەلێكی ئاشتی پەروەر.

 رووداوەكانی ناو مێژوی دورودرێژی گەلان سەلماندویانە، هاوكێشە و مامەڵەی دەوڵەتان و كاری سیاسی راست و دروست بووبێت یان نا، ئاشتی و پێكەوە ژیان هەمیشە بژاردەی هەرە راست و هەرە پێویست بووە بۆ كورد.