وێنە.. ئەرشیف
راچڵەكین -
سوپای ئیسرائیل تونێلێكی تیرۆریستانی حەماس لە كەرتی غەززە لەناودەبات كە درێژییەكەی دوو كیلمەتر بووە، وتەبێژی سوپاكەش ئاشكرایدەكات، سەرجەم ئەو تیرۆریستانەی لەناو تونێلەكەدا بوون، كوژران.
ئەفیخای ئەدروعی، وتەبێژی سوپای بەرگریی ئیسرائیل رایگەیاند: لەچوارچێوەی ئۆپەراسیۆنە سەربازییەكان بۆ لەناوبردنی چەكدارانی حەماس لە غەززە، هێزەكانیان توانییان تونێلێك لەشاری بەیت حانون-ی باكووری كەرتی غەززە خاپوور بكەن، كە لەنزیك سنووری ئیسرائیل لێدرابوو.
بەوتەی ئدروعی، درێژیی تونێلەكە دوو كیلۆمەتر بووە و تەنها پێنج كیلۆمەتر لە هێڵی شەمەندەفەری نێوان هەردوو شارۆچكەی ئەشكەلون و سدیرۆت-ی ئیسرائیلەوە دوور بوو.
سوپای ئیسرائیل دیمەنی خاپووركردنی تونێلەكەی حەماسی بڵاوكردەوەو وتەبێژیەكەشی ئاشكرایكردووە، لەكاتی تەقاندنەوەی تونێلەكەدا، كە چەندین ژووری تایبەت و چەند جۆرێك چەك و تەقەمەنی تێدابووە، سەرجەم ئەو چەكدارانەی حەماس كە خۆیان لەناو تونێلەكەدا حەشاردابوو، كوژران.
سوپای ئیسرائیل ماوەی دوو مانگە ئۆپەراسیۆنێكی فراوانی بۆسەر ناوچەكانی كەرتی غەززە دەستپێكردووە بەئامانجی لەناوبردنی توانا سەربازییەكانی حەماس، تائێستاش چەندین ناوچەی غەززەی لە دانیشتووانەكەی چۆڵكردووە، بەبیانووی ئەوەی ئەو ناوچانە بوونەتە مۆڵگەی چەكدارانی حەماس و لەوێیوە هێرشی مووشەكی دەكەنە سەر هێزەكانی ئیسرائیل.