راچڵەكین-
چاوەكان ئەمڕۆ لەسەر نوسینگەی عەمار حەكیم سەرۆكی ڕەوتی حیكمەن، كە بڕیارە چوارچێوەی هەماهەنگی كۆبوونەوەیەكی تێدا ئەنجامبدات بۆ یەكلاكردنەوەی كاندیدی پۆستی سەرۆكوەزیرانی داهاتووی عیراق.
عەلی عەبدولئەمیر جوحی، ئەندامی هاوپەیمانی ئاوەدانكردنەوە و گەشەپێدان بەرۆژنامەی سەباحی راگەیاندووە، دواخستنی كۆتا كۆبوونەوە گوزارشت بوو لە كۆتایی هاتنی بژاردەی كاندیدی سازان و هەنگاونانە بەرەو یەكلابوونەوە لەسەر كاندیدی گەورەترین فراسكیۆنی چوارچێوەی هەماهەنگی، لە ئاماژەیەكدا بۆ نوێكردنەوەی ویلایەتی سەرۆكایەتی محەمەد شیاع سودانی.
لە بەرامبەردا لایەنە سیاسییەكان لەناو چوارچێوەی هەمەهانگی جەختدەكەن لە بەردەوامی جیاوازی و بۆچوونەكان دەكەنەوە سەبارەت بە شێوەی حكومەتی داهاتوو، هەندێكی دیكەش داوای دەستنیشانكردنی كەسایەتییەكی كۆدەنگی دەكەن كە توانای بەڕێوەبردنی قۆناغی داهاتووی هەبێت، بە لەبەرچاوگرتنی ئاڵۆزییە سیاسییە ناوخۆییەكان و زیادبوونی فشارەكان.
زەهرا سەدر، ئەندامی مەكتەبی سیاسی رەوتی حیكمە، كۆبوونەوەكەی ئەمڕۆی نووسیگەی عەممار حەكیم بە گرنگ و یەكلاكەرەوە وەسف دەكات و دەڵێت، هەنگاوێكی بەرچاوە لە دیاریكردنی كاندیدی سەرۆكوەزیرانی داهاتوو:" دواخستنی كۆبوونەوەكەی رابردووی چوارچێوەی هەماهەنگی لەسەر داوای محەمەد شیاع سودانی، سەرۆكوەزیرانی عیراق بووە، بە ئامانجی روونكردنەوەی هەڵوێستی كۆتایی خۆی ، بۆ بەردەوامبوونی لە كاندیدبوون یان دەستبەرداربوون و هەنگاونان بەرەو كاندیدی سازانی پێشنیازكراو."
سەدر دەڵێت، باسكردن لەناوی تر وەك كاندیدی سازان، دواتر رەتكردنەوەی كشانەوەی كاندیدبوونی نوری مالیكی لەلایەن حزبی دەعوە، دۆخەكەی گەڕاندەوە بۆ خاڵی سەرەتا.