راچڵەكین -
مەسرور بارزانی پشتیوانیی خۆی بۆ پێكهێنانی حكومەتی نوێی عیراق دەردەبڕێت و راشیدەگەیەنێت: ئێستا دەرفەتێكی نوێ هاتووەتە ئاراوە كە كێشەكان بە شێوەیەكی بنەڕەتی و یەكجارەكی چارەسەر بكرێن و بە شێوەیەكی دادپەروەرانە ڕەفتار لەگەڵ هەرێمی كوردستان بكرێت.
ئەمڕۆ شەممە، عەلی زەیدی، راسپێردراو بۆ پێكهێنانی كابینەی نوێی حكومەتی عیراق، سەردانی هەولێری كرد و لەگەڵ مەسرور بارزانی، سەرۆكی حكومەتی هەرێم كۆبووەوە.
بەگوێرەی راگەیەندراوێكی فەرمانگەی میدیاو زانیاری، لە كۆبوونەوەكەدا هەوڵ و گفتوگۆكانی پێكهێنانی كابینەی نوێی حكومەتی فیدراڵ تاوتوێ كرا و سەرۆكی حكومەتی هەرێم دووپاتی كردەوە كە ئێمە پشتیوانی پێكهێنانی حكومەتی نوێ دەبین لە پێناو چارەسەركردنی كێشە هەڵپەسێردراوەكانی نێوان هەرێمی كوردستان و حكومەتی فیدراڵ لەسەر بنەمای دەستوور و ڕێزگرتن لە مافەكانی خەڵكی كوردستان و قەوارەی فیدراڵی هەرێمی كوردستان.
مەسرور بارزانی جەختیشی كردەوە كە ئێستا دەرفەتێكی نوێ هاتووەتە ئاراوە كە كێشەكان بە شێوەیەكی بنەڕەتی و یەكجارەكی چارەسەر بكرێن و بە شێوەیەكی دادپەروەرانە ڕەفتار لەگەڵ هەرێمی كوردستان بكرێت و بەڕێوەبردنی پرۆسەی سیاسی عێراقیش لە سەربنەمای هاوبەشی ، هاوسەنگی و سازان بێت.
لە بەرامبەردا سەرۆكوەزیرانی ڕاسپێردراوی عیراق، سوپاسی پێشوازی و پشتیوانیی سەرۆكی حكومەتی كرد و جەختی كردەوە كە بەهێزبوونی هەرێمی كوردستان، بەهێزبوونی حكومەتی فیدراڵییە و دڵنیایی دەدەین كە بە شێوەیەكی دادپەروەرانە، مامەڵە لەگەڵ هەرێمی كوردستان دەكەین.