راچڵەكین -
  
وەزارەتی رۆشنبیری و لاوانی حكومەتی هەرێمی كوردستان، ئیدانەی پەلاماردانی هاندەرانی یانەی وەرزی هەولێر لەلایەن هاندەرانی یانەی شورتەی بەغدا دەكات و رایدەگەیەنێت: پێویستە ڕێگە نەدرێت ئەم ڕەفتارە ببێتە هۆی دروستبوون و گەشەكردنی گوتاری ڕق و كینە و گرژی.

بەگوێرەی راگەیەندراوێكی وەزارەتی رۆشنبیری، كە ئەمڕۆ شەممە 5-9-2026، ئاڕاستەی ڕای گشتی و لایەنە پەیوەندیدارەكان و ناوەندە وەرزشییەكانی عیراقی كردووە، تێیدا هاتووە، بەداخەوە، دوای كۆتایی هاتنی یاری نێوان هەردوو یانەی هەولێر و یانەی شورتە لە خولی ئەستێرەكانی عێراق لە شاری بەغدا، ژمارەیەك لە هاندەرانی یانەی شورتە پەلاماری هاندەرانی یانەی هەولێریان دا، ئەم پەلامارە نەشیاوە بووە هۆی برینداربوونی چەندین هاندەر و زیانگەیاندن بە پاسەكانی گواستنەوەیان.

وەزارەتەكە وێڕای ئیدانەكردنی "ئەم ڕەفتارە نابەرپرسانەیە" ئاماژەی بەوەشكردووە كە وەرزش پەیامی ئاشتی، تەبایی، ڕەوشتبەرزی و ڕێزگرتنی یەكترە، نەك توندوتیژی و هاندانی گیانی ڕەگەزپەرستی، كە لێكەوتەی مەترسیداری بۆ پەیوەندییە وەرزشی و كۆمەڵایەتییەكان دەبێت.

لە بەشێكی راگەیەندراوەكەدا جەخت لەوە كراوەتەوە كە پێویستە ڕێگە نەدرێت ئەم ڕەفتارە ببێتە هۆی دروستبوون و گەشەكردنی گوتاری ڕق و كینە و گرژی، پێویستە وەرزش ببێتە مایەی بەهێزكردنی گیانی هاوبەشی، پێكەوەژیان و بەهێزكردنی پەیوەندییە كولتوورییەكان.

ئەوەش روونكراوەتەوە كە "هەمووان شاهێدی ئەوەن هەرێمی كوردستان هەمیشە ماڵێكی ئارام و ناوەندێكی سەرەكی بوون بۆ بەڕێوەچوونی پاڵەوانێتی و چالاكییە وەرزشییەكان لەسەر ئاستی عیراق و نێودەوڵەتی لە سەرجەم یارییە وەرزشییە جۆراوجۆرەكاندا. ئەمەش سەلمێنەری ئەوەیە هەرێمەكەمان هەمیشە سەكۆی ئاشتی و پێشوازیكردن بووە لە وەرزشوانان و هاندەران بەبێ جیاوازی".

وەزارەتی رۆشنبیری ئاماژەی بەوەشكردووە كە لە سۆنگەی باوەڕیان بە سەروەریی یاسا بۆ پاراستنی گیانی هاندەران، یاریزانان و دەستەی كارگێڕیی یانەكانمان و ڕێگریكردن لە دووبارەبوونەوەی ئەم كردەوانە، داواكارن لایەنە پەیوەندیدارەكان لە حكومەتی فیدڕاڵی ڕێوشوێنی ئەمنیی و ڕێكاری یاسایی بگرنەبەر بۆ پارێزگاریكردن لە سەلامەتی گیانی یاریزانان و هاندەرانی یانەكانی هەرێمی كوردستان و سەرپێچیكاران ڕووبەڕووی لێپرسینەوەی یاسایی بكەنەوە.

وەزارەتەكە وێرای دووپاتكردنەوەی پشتگیریی تەواوی بۆ یانەكانی (هەولێر، دهۆك، زاخۆ، نەورۆز) و سەرجەم هاندەرانیان، داواشیكردووە لیژنەی ئینزیباتی یەكێتیی تۆپی پێی عێراق بەپێی پەیڕەوی ناوخۆیی خولی ئەستێرەكان، یانەی سەرپێچیكار بێبەش بكات لە ئامادەبوونی جەماوەرەكەی لە یارییەكانی داهاتوودا.