راچڵەكین-
ئەمڕۆ ئەنجومەنی وەزیرانی هەرێمی كوردستان كۆدەبێتەوە، یەكێك لە تەوەرە سەرەكییەكانی كۆبوونەوەكە هەڵوێستی حكومەتی هەرێمی كوردستان دەبێت سەبارەت بە پێشێلكارییە بەردەوامەكانی سەروەریی خاكی عیراق و هەرێمی كوردستان.
فەرمانگەی میدیا و زانیاری بڵاویكردووەتەوە، ئەمڕۆ چوارشەممە، 23ی تشرینی دووەمی 2022، ئەنجومەنی وەزیرانی هەرێمی كوردستان بەسەرپەرشتی مەسرور بارزانی، سەرۆكی ئەنجومەنی وەزیران كۆدەبێتەوە و تێیدا چەندین بڕگه و بابەت تاوتوێدەكات.
بڕگەی یەكەمی كۆبوونەوەكە تایبەت دەبێت بە توندوتۆڵكردنی رێنمایی و بەدواداچوون و لێپرسینەوە لە پێوەر و رێكارەكانی خۆپارێزی و مۆڵەتی پیشەكان لە پێناو پاراستنی ژیان و سەلامەتی هاووڵاتییان.
برگەی دووەمی كۆبوونەكە تایبەت دەبێت بە هەڵوێستی حكومەتی هەرێمی كوردستان سەبارەت بە پێشێلكارییە بەردەوامەكانی سەروەریی عێراق و هەرێمی كوردستان.
لە بڕگەی سێیەمدا پێشنیاری وەزارەتی كار و كاروباری كۆمەڵایەتی بۆ هەمواركردنی پەیڕەوی دایەنگەكان دەخرێتەڕوو.