"مارگرێت تاتچەر"ی سەرۆكوەزیرانی بەریتانیا و "ڕۆناڵد ڕیگن"ی سەرۆكی ئەمریكا، لەكاتی ماوەی سەرۆكایەتیەكانیان كارنامەكانیان زەرەری بە مرۆڤایەتی گەیاند، حكومەتیان بچوككردەوە و گرنگیان بە كۆمپانیاكان دا، هەروەها "بازاڕێكی ئازادیان دروستكرد و مرۆڤەكانیان تێ فڕێدا و كێ توانیویەتی سەركەوێت ژیانێكی شاهانەی بردەسەر و ئەوانەش كە دواكەوتن خنكان" !!، "چۆمسكی" گەورە فەیلەسوفی ئەمریكی لەم بارەوە لە دیدارێكدا پارساڵ ڕەخنەی توندی لە سیاسەتی ڕابردووی (مارگرێت تاتچەر و ڕۆناڵد ڕیگن) گرت و ڕایگەیاند: پلانەكانیان بۆ بچوككردنەوەی حكومەت و بەهێزكردنی كۆمپانیاكان گەورەترین هەڵەبوو لە مێژوودا چونكە (كۆمپانیاكان نرخی مرۆڤیان لانیە و گرنگترین بابەت بەلایانەوە لەبری خزمەتی مرۆڤایەتی قازانجی مادییە).
لەبێ ئاگایی بێت یان بە زانابوون پلانەكانی (تاتچەر و ڕۆناڵد ڕیگن) بە دەستكارییەوە لە سیاسەتی "میدیا"ی هەرێمی كوردستاندا ڕەنگی داوەتەوە، میدیا لە ئەركەكەی دووركەوتۆتەوە لەبری پێدانی هۆشیاری كۆمەڵایەتی و پەروەردەكردنی تاكی ناو ئەم كۆمەڵگەیە، تەنها بیریان لای كۆكردنەوەی زۆرترین بینەر و لایك و كۆمێنتە و پەنا بۆ بڵاوكردنەوەی هەواڵی ڕۆژانەی خۆ(كوشتن. سوتاندن. خنكاندن)ی كچان و ژنانی هەرێمی كوردستان دەبەن و ئەم هەواڵانەش كاریگەری خراپ لەسەر تاكی كوردی دروست دەكات، وەكو هاندانێك بۆ پەرەپێدانی خۆ (بە قوربانیكردن) دێتە هەژمار، بەداخەوە گوێ نەدانی (دایك و باوك) بە نەوەكانیان و نەبونی پەروەردەی خێزانی دەرگای تۆڕە كۆمەڵایەتیەكانی بەڕووی منداڵ و گەنجاندا فراوان و كاریگەركردووە بەجۆرێك ئەو بۆشاییەیان پڕكردۆتەوە كە لە نەبونی سۆزی (دایك و باوك) دروستبووە.
سەیرە!!، بچوككردنەوە و هەڵوەشاندنەوەی خێزان، نەهێشتنی پەیوەندییە كۆمەڵایەتیەكان، بردنی تاكەكانی كۆمەڵگە بەرە و هەڵدێر و گێژاو، بۆتە ئەركی سەرەكی ژمارەیەكی زۆر لە میدیای كوردی، كە لەم میمبەرە پەنابردن بۆ خۆكوشتن بە شێوازی جیاجیا وەكو (خۆ بە پاڵەوان) كردن و ڕزگاربوون لە دەردە سەریەكان لێكدەدرێتەوە، ئامانجی میدیا لەم كارە چیە؟ بۆچی گرنگی بە بڵاوكردنەوەی خۆكوشتن یان خۆ سوتاندن یان خۆخنكاندنی كچان و ژنان دەدات و دەیان و سەدان ڕاپۆرتی هەواڵی لێ دروست دەكەن، باوەڕناكەم بابەتەكە تەنها پەیوەندی بە هەژاری میدیاكارانەوە بێت و لە نەبونی هەواڵدا پەنا بۆ بڵاو كردنەوەی ئەم جۆرە لە هەواڵ دەبەن، ئەمە پێویستی بە هەڵوەستەكردنە و ڕەنگە پلانێكی ورد لەپشت ئەم بابەتەوە بێت.
دەبێت بەپەلە "شۆڕشێك بۆ ڕەتكردنەوەی خۆ بە قوربانیكردن دەست پێبكەین"، بە هەر نرخێك بووە تاك لەو دەردە كوشندەیە ڕزگار بكەین كە چارەسەری كێشەكانی لە (خۆ كوشتن)دا دەبینێتەوە، ئەمەش سەرەتا بە ڕاگرتنی ئەو هەواڵانە دێت كە لە میدیاوە بە بەردەوامی بە گوێی تاك بە تاكی ئەم كۆمەڵگەیەدا دەدرێت، هەروەها ئەركی سەرەكیش دەكەوێتە سەر دایك و باوك لە باشترین جۆری پەروەردەكردنی نەوەكانیان، بەو جۆرەی ژیانیان لا خۆشەویست بكەن و توانای هزریان بە ڕادەیەك بەرزبكەنەوە بۆ ئەوەی بتوانن بەسەر كێشە و گرفتەكانی بەردەمیاندان سەربكەون و چارەسەریان بۆ كێشەكان هەبێت.
لەگەڵ ئەمانەشدا بەگشتی (نوسەر و میدیاكار و ڕێكخراوەكان و زانكۆ و پەیمانگاكان بە سێكتەرە حكومیە پەیوەندیدارەكان)ی ترەوە دەبێت شۆڕشێك بەرپابكەن و ئەولەویەتیان هۆشیاركردنەوەی خێزان و تاك بێت كە بەكام جۆری پەروەردە نەوەكانیان پێبگەیەنن تا لەگەڵ ئەمڕۆی جیهانی تەكنەلۆژیا خۆیان بگونجێنن و سەریان لێ نەشێوێت و بەرگە بگرن، گومانیش لەوەدانیە هۆکاری خۆ کوشتنەکان زۆرن و بەشێکی پەیوەندی بە خەمساردی حکومەت و بەشێکی پەیوەندی بە بێ باکی خێزانەکانەوە هەیە، ژمارەیەک لە میدیاش هێندە حاڵەتەکان گەورە دەکەن و لەسەری دەڕۆن دوورنیە ببێته دیاردەیەکی ڕۆژانه و وابڕوات چەند ساڵی ئایندە ڕەوشەکە بە جۆرێک خراپ دەبێت هیچ خێزانێک بەدەرنابێت لە لەدەستدانی ئازیزێکی