هاوپەیمانیی کوردستان یان پارتی دەبێتە یەکەم؟

عارف قوربانى


پێش 4 هەفتە

ئەم هەڵبژاردنەی بڕیارە لە 10ی ئۆكتۆبەر بەڕێوەبچێت، بە ئەندازەی هەموو لایەنە بەشدارەكانی ناو پرۆسەی سیاسیی عێراق و هەرێمی كوردستان، بۆ یەكێتیی نیشتمانیی كوردستان گرنگە، چونكە لە چەندین رووەوە ئەم حیزبە دەخاتە بەردەم تاقیكردنەوەی سەختەوە. 
 
لە دوای نەخۆشكەوتنی تاڵەبانییەوە پێگەی سیاسیی یەكێتی لە بەغدا و لە هەولێر رووی لە لاوازیكردووە، ژمارەی دەنگ و جەماوەرەكەی ساڵ له ‌دوای ساڵ كەمتر دەبوونەوە. لەناو هەناوی حیزبەكه ‌و لە دەرەوەی یەكێتیش مشتومڕ زۆر بوون لەسەر شەنوكەوكردنی هۆكارەكانی پاشەكشێی ئەم هێزە سیاسییە، بەتایبەت لە بەرانبەر ركابەرەكەی كە پارتییە و تا چەند ساڵێك لەمەو پێش ئەگەر دەنگەكانی یەكێتی لە پارتی زۆرتر نەبووبێت كەمتریش نەبووە. بۆیە جێگەی هەڵوەستە لەسەركردن بوو حیزبێك رۆژگارێك لە نیوەی رێژەی دەنگ و كورسییەكانی پەرلەمانەوە بگاتە ئەو ئاستە. 
 
دەنگی زاڵ لەناو یەكێتی و لە دەرەوەی حیزبەكەش ئەوە بوو كە هۆكارەكانی لاوازبوونی پێگەی یەكێتییان دەبەستەوە بە خراپیی رۆڵ و ئەدای ئەوانەی یەكێتییان بەڕێوه دەبرد (مەكتەبی سیاسی و سەركردایەتییەكەی). ئەمە بووە بناخەی ئەو شەپۆلە ناڕازییەی ناو یەكێتی كە سەرئەنجامەكەی لە كۆنگرەی چوارەمی حیزبەكە بە ئاوتكردنی ئەو جیلە كۆنە كۆتاییهات كە پێشتر یەكێتییان بەڕێوەبردبوو، جیلە گەنجەكە نەك چوونە ناو ناوەندەكانی دەسەڵاتەوە، بەڵكو هەموو حیزبەكەشیان كۆنترۆڵكرد.  
 
له ‌دوای كۆنگرەشەوە زۆرترین پڕوپاگەندەی ئەوە كراوە كە ئەم یەكێتییە، یەكێتییە لەڕ و لاوازەكەی پێشووتر نییە، بەهێز و گوڕوتینێكی تازەوە هەستاوەتەوه ‌و لە هەموو ئاستەكاندا داوای هاوسەنگی لە ركابەرەكەی دەكرد. كەواتە بە پلەی یەكەم بەهۆی ئەو ئاڵوگۆڕە ناوخۆییەی لە كۆنگرەی چوارەم لەناو یەكێتیدا روویدا، ئەم هەڵبژاردنە وەك یەكەم ئەزموونی سەركردایەتیی نوێ‌، دەبێتە سەنگی مەحەك بۆ دەرخستنی توانا و لێوەشاوەییان لە بەڕێوەبردنی قۆناخی "هەستانەوە" وەك خۆیان ناویان نابوو.  
 
یەكێتیی نیشتمانیی كوردستان زۆرجار نیگەرانی لەوە دەربڕیبوو كە یاسای هەڵبژاردنەكان لە عێراق و هەرێمی كوردستان یەكێكە لەو هۆكارانەی كە پارتی دیموكراتی كوردستانی بە بەهێزی هێشتووەتەوە، تەنانەت لە ئاستی باڵای حیزبەكەدا چەند جارێك ئەوەیان دووپاتكردووەتەوە كە پارتی بە دەنگی بادینانەوە حوكمی هەموو كوردستان دەكات. لەوەش دڵنیابوون ناتوانن بەئاسانی یاسای هەڵبژاردنەكان لە كوردستان بگۆڕن ئەگەر لە بەغداوە مۆدێلێكی دیكەی شێوازی هەڵبژاردن نەهێننە ئاراوە، بە ئامانجی ئەوەی لە قۆناخی داهاتوودا بكرێتە بنەما بۆ گۆڕینی یاسای هەڵبژاردنەكانی كوردستانیش بۆ فرەبازنەیی. بۆیە ئەم یاسا تازەیەی وەك یەكەم ئەزموون هەڵبژاردنی ئۆكتۆبەری پێبەڕێوەدەبرێت، لە بنەڕەتدا پرۆژەی یەكێتیی نیشتمانیی كوردستان بوو و‌ لەلایەن نوێنەری یەكێتیی نیشتمانیی كوردستانەوە لە لووتكەی دەسەڵاتی عێراقەوە پێشكێش بە پەرلەمان كرا. هیچ گومانێكیش لەوەدا نییە كە ئەم سیستەمە نوێیەی هەڵبژاردن لە هەرێمی كوردستان لە بەرژەوەندیی یەكێتیی نیشتمانیی كوردستاندایە.
 
كاتێك بزووتنەوەی گۆڕان دروستكرا، هەرچەندە خۆیان بەو جۆرە وێنا دەكرد هێزێكی ركابەری پارتی و یەكێتین، بەڵام لە واقیعدا دروستبوونی ئەم هێزە لە منداڵدانی یەكێتییەوە هاتبووە دەرەوە، ژمارەیەكی زۆر لە سەركردایەتی و كادیر و جەماوەر و دەنگدەری یەكێتی بوون و لە واقیعدا بووە ركابەری یەكێتی لە زۆنی سەوز و دەنگی لە یەكێتی دەبرد نەك لە پارتی. بۆیە دروستبوونی هاوپەیمانی لەنێوان یەكێتیی و گۆڕان بەجۆرێك لە جۆرەكان كۆكردنەوەی دەنگە پەرتبووەكانی پێشووتری یەكێتییە، هەروەها ژمارەیەك خەڵكی دیكەیش كە پێشووتر یەكێتی نەبوون و بوونە گۆڕان و ئێستا بەهۆی ئەم هاوپەیمانێتییەوە دەنگەكانیان ئاو دەكاتە ئاشی بەهێزبوونەوەی یەكێتییەوە. 
 
بەو سێ‌ پێوەرەی له ‌سەرەوە باسمكردوون دەبێت ئەم هەڵبژاردنەی ئەنجوومەنی نوێنەرانی عێراق، یەكێتیی نیشتمانی وەك چەتری هاوپەیمانیی كوردستان كە لەگەڵ بزووتنەوەی گۆڕان پێكیهێناوە، ببێتە هێزی ژمارە یەكی كوردستان و زۆرترین دەنگی خەڵك و ژمارەی كورسییەكان بە دەستبهێنێت. چونكە لەلایەك یەكێتی پاساوی ئەوەی نەماوە كە سەركردایەتییە كۆنەكان هۆكاری نیگەرانیی جەماوەرن، هەروەها سیستەمی فرەبازنەیی لە بەرژەوەندیی یەكێتیدایە، سێیەمیش بەهۆی ئەو هاوپەیمانێتییەی لەگەڵ گۆڕان دروستیكردووە بنكە جەماوەرییەكەیان بووەتەوە به ‌یەك. لە هەموو ئەوانەش روونتر ئەوەیە وەك چۆن كورد دەڵێت (گوێز بە ژمارە، مایەكەی دیارە). رێژەی دەنگی لایەنەكانی دیكەی ركابەری هاوپەیمانی بە بەراورد بە هاوپەیمانی، وەك مانگی چواردە دیارە كە دەبێت هاوپەیمانی بیباتەوە. بەڵام ئایا لە واقیعدا هاوپەیمانی دەیباتەوە؟ 
 
سەرەتا با بزانین بۆچی بەپێی ژمارەی دەنگەكان هەلومەرج لە بەرژەوەندیی یەكێتیی و گۆڕان بوو كە ببنە هێزی یەكەمی هەڵبژاردن. 
هەرێمی كوردستان بەپێی بازنەكانی هەڵبژاردن و رێژەی ئەو كورسییانەی بۆ پارێزگاكان دیاریكراوە (45) كورسییە، 18 كورسی بۆ پارێزگای سلێمانی، 15+1 بۆ هەولێر، 11 بۆ دهۆك. لە ناوچە كوردستانییەكانی دەرەوەی هەرێمی كوردستان، كورد ئەگەری بەدەستهێنانی شەش كورسیی كەركووك و هەشت بۆ نۆ كورسیی نەینەوا و یەك كورسیی دیالە و یەك كورسیی پارێزگای سەلاحەدینی هەیە. واتا جگە لە 45 كورسییەكەی ناو هەرێمی كوردستان، شانسی ئەوەی هەیە 17 كورسی لە ناوچە كوردستانییەكانی دەرەوەی هەرێمیش بەدەستبهێنێت و رێژەی كورسییەكانی بگاتە 62 كورسی پەرلەمانی.
 
ساڵانێكی زۆریشە هێزە ركابەرەكانی پارتی نیگەرانی ئەوەن كە پارتی حوكمی كوردستانی بەدەسته ‌و رۆڵی یەكلایكەرەوە لە نوێنەرایەتیی بەغداش هەر لای ئەوە، لایەنەكانی نەیاری پارتی بەجیاجیا و پێكەوەش زۆر كاریان بۆ گۆڕینی ئەم هاوكێشەیە كرد و ئەنجامی ئەوتۆی نەبووە. بەڵام بۆ هەڵبژاردنی ئەمساڵ چاوەڕوانكراو بوو بتوانرێت ئەو رۆڵە لە پارتی وەربگیرێتەوە و هاوپەیمانیی كوردستان ببێتە جێگرەوەی پارتی بە حوكمی ئەوەی زۆرینەی كورسییەكانی كورد بەر هاوپەیمانی دەكەوت. لە واقیعدا و بە هەموو پێوەرێك دەبوو ئەنجامەكەی وابووایا كە هاوپەیمانی ببوایەتە براوەی یەكەم و پارتی دووەم، بەڵام ئەمە روونادات، چونكە له ‌سەرەتاوە كڵاوێك كراوەتە سەر یەكێتیی نیشتمانیی كوردستان، رەنگە دوای هەڵبژاردن ئەوكات هەستی پێبكات. 
 
پارتی جگە لە دهۆك و هەولێر و نەینەوا، لەم هەڵبژاردنەدا شانسی بەدەستهێنانی كورسی لە پارێزگاكانی دیكەی وەك سەلاحەدین و دیالە و كەركووك و سلێمانی لاوازە. بەڵام هاوپەیمانیی كوردستان جگە لە سلێمانی و كەركووك و دیالە و سەلاحەدین، لە دهۆك و نەینەوا و هەولێریش شانسی ئەوەی هەیە كورسی بەدەستبهێنێت، بەو هۆیەوە دەیتوانی ببێتە هێزی یەكلاكەرەوە. چونكە بەپێی رێژەی ئەو دەنگانەی لە هەر پارێزگایەك و سنووری هەر بازنەیەكی هەڵبژاردندا هەیەتی، دەبوو 16 كورسیی پارێزگای سلێمانی و شەش كورسیی كەركووك و پێنج كورسیی هەولێر و یەك كورسیی دهۆك و دوو كورسیی نەینەوا و یەك كورسیی سەلاحەدین و كورسییەكی دیالە بەرێت كە چاوەڕوان دەكرا كورسییەكانی بگەنە زیاتر لە 30 كورسی. بەڵام ئەمە روونادات. 
 
هۆكاری ئەوەی وادەكات هاوپەیمانی نەتوانێ‌ ئەو دەنگانە بەدەست بهێنێت ئەوە نییە كە خەڵك متمانەی بە هەڵبژاردن لاواز بووە، ئەگەری رێژەی بەشداری كەمترە بە بەراورد بە هەڵبژاردنەكانی پێشووتر. چونكە تا رێژەی بەشداریی خەڵكی ناڕازی و تووڕە لە حیزبەكان كەمتر بێت لە بەرژەوەندیی حیزبە گەورەكاندایە، ئەوكات تەنها بە دەنگی مووچەخۆر و ئەندام و رێكخستنەكانی خۆیان دەردەچن، با رێژەی بەشداری و ژمارەی دەنگەكان هەر كەم بن. هۆكارەكە شتێكی دیكەیە، ئەوەی بە هەڵە یاخود وەك كڵاو كراوەتە سەر یەكێتی، دیاریكردنی جۆری كەسایەتییەكانە وەك بەربژێر و ژمارەیانە بەپێی بازنەكانی هەڵبژاردن. 
 
لەبەر ئەوەی سیستەمەكە فرەبازنەیە و راستەوخۆ دەنگ بە بەربژێر دەدرێت نەك بە قەوارەی سیاسی، كەواتە پێویست وابوو یەكێتیی و گۆڕان ناسراوترین و بەهێزترین كەسایەتییەكانی خۆیان لەو ناوچانە بەربژێر بكردایا كە خاوەن پێگه ‌و نفوزی جەماوەرین، بەڵام ئەمانەی ئێستا بەربژێركراون هەندێكیان رەنگە كەمترین پێگە و ناسراویان هەبێت لە سنووری ئەو بازنەیەی خۆیان تیا پاڵاوتووە. هەروەها دەبوو بەپێی رێژەی دەنگەكانیان لەو بازنەیە بەربژێر دیاری بكرایا نە زیاد و نە كەم، ئەوەی ئێستا كردوویانە لە هەندێ‌ بازنە لەبەر زۆری دەنگ و كەمیی بەربژێر دەنگیان بە هەدەر دەچێت و لە هەندێ‌ بازنە لەبەر كەمیی دەنگ و زۆری بەربژێر دەنگەكانیان بڵاودەبێتەوه ‌و ناگاتە ئەوەی كورسی پێبەدەستبهێنرێت. دەبێت دەزگای هەڵبژاردنی یەكێتی بخرێتە بەردەم بەرپرسیارێتیی ئەوەی بۆ وا كراوە؟ كە من باوەڕم بەوەیە ئەمە بە هەڵە بەسەریاندا تێنەپەڕیوە، بەڵكو كەسانێك بە مەبەست بەو ئاراستەیە بردوونی تا هاوپەیمانی نەبێتە براوەی یەكەم، بەتایبەتیش بۆ ئەوە بووە پارێزگای كەركووك و سلێمانی بۆ یەكێتی و گۆڕان یەكلایی نەبێتەوە.
 
لێرەدا زیاتر تیشك دەخەینە سەر هەندێ‌ وردەكاریی بازنەكانی ئەم دوو پارێزگایە. 
 
كەركووك 12 كورسی بۆ تەرخانكراوه ‌و دابەشكراوەتە سەر سێ بازنە، یەكێك لە بازنەكان كە سێ‌ كورسی بردووە، دراوەتە حەویجه ‌و كورد هیچ شانسێكی لەو بازنەیە نییە. بازنەی یەكیش زیاتر ناوچە كوردییەكانی گرتووەتەوه ‌و پێنج كورسی بۆ دیاریكراوه ‌و بۆ كورد یەكلابووەتەوە. ئەوەی دەمێنێتەوە كە هەر سێ پێكهاتەكەی كەركووك كێبڕكێی لەسەر دەكەن بازنەی دووەمە. لە باشترین حاڵەتدا كورد شانسی ئەوەی هەیە پێنج كورسییەكەی بازنەی یەكەم و كورسییەك لە بازنەی دووەم بەرێت، واتا كورد ئەگەری ئەوەی هەیە بتوانێت شەش كورسییەكەی پێشووتری بەدەستبهێنێتەوە. ئەوەی لەناو هەموو بەربژێر و هێزە كوردییەكانیش شانسی زیاترە ئەوەیە كە هاوپەیمانیی كوردستان بتوانێت ئەو شەش كورسییە‌ بەرێت. كەواتە لە سادەترین پلان و خۆئامادەكردنی لیستی هاوپەیمانی بۆ كەركووك دەبوو ئەم قەوارەیە شەش كەس بەربژێر بكات. بەڵام ئێستا هەشت كەسی بەربژێر كردووە. لە بازنەی یەك شەش بەربژێر و لە بازنەی دوو بەهەمان شێوە دوو بەربژێری هەیە. 
 
ئەمە نە زانستی دەوێت و نە شارەزایی، كاتێك باشە كە بەربژێری زیاتر دابنرێت، ئەگەر دەنگدەر دەنگ بە قەوارە بدات، ئەوكات دەگوترێت بەهۆی زۆری بەربژێرەكانمانەوە دەنگی زۆر بۆ قەوارەكە دەچێت و هێزی قەوارەكە كورسی دیاری دەكات. بەڵام بەپێی ئەم سیستەمە راستەوخۆ دەنگ بە بەربژێر دەدرێت و هەموو كەس دەزانێت دابەشبوونی دەنگەكان بەسەر بەربژێری زیاتردا رێژەی دەنگەكانیان كەمدەكاتەوە. هاوپەیمانیی كوردستان بۆ بازنەی یەك كە كێبڕكێ‌ لەسەر پێنج كورسی دەكرێت شەش بەربژێری هەیە. لە بازنەی دووەمیش لە باشترین حاڵەتدا كورد یەك كورسی بەدەست دەهێنێت، هاوپەیمانی بە تەنیا دوو بەربژێری هەیە. بەهۆی ئەوەی ژمارەی بەربژێرەكانی لە ژمارەی كورسییەكان زیاتره،‌ ئەمەش وادەكات شانسی بەدەستهێنانی كورسییەكانی كەمتر ببێتەوە لە شەش كورسییەوە بۆ 4 یا 5 كورسی. ئامانجەكە ئەوەیە كە یەكێتی بە تەنیا نوێنەرایەتیی كەركووك نەكات. 
 
لە پارێزگای سلێمانی هاوپەیمانیی كوردستان پێچەوانەی پارێزگای كەركووكی كردووە، لە چەند بازنەیەك رێژەی دەنگەكانی زۆر زیاترە لە بەهای ئەو كورسییانەی بەربژێری بۆ دیاریكردووە. یەكێتی و گۆڕان پێكەوە لە هەڵبژاردنەكانی رابردوو زۆرینەی دەنگی پارێزگای سلێمانیان هەبووە. ئەم هەڵبژاردنە بەهۆی ئەوەی دەنگی هەر قەوارەیەكی سیاسی دابەشدەبێت بەسەر پێنج بازنەدا جگە لە هاوپەیمانیی كوردستان هیچ هێزێك شانسی ئەوەی نەبوو هیچ كورسییەك لەم پارێزگایە بهێنێت، ئەگەر یەكێتی و گۆڕان بەو جۆرە بەربژێریان دیاری بكردایا بەسەر بازنەكاندا كە دڵنیایی بردنەوەیان هەبوو. بەڵام ئەوەی جێی گومانە ئەوەیە كە لە بازنەی وا هەیە هاوپەیمانیی كوردستان لە بەدەستهێنانی كورسیی ئەو بازنەیەدا دەبێتە كەمینە. مایەی هەڵوەستە لەسەر كردنە بۆچی یەكێتی رازی بووە، بەو جۆرە مامەڵە لەگەڵ ئەو دەرفەتە بكرێت كە بۆی رەخسابوو كە سلێمانی بۆ یەكلاببێتەوه ‌و ئێستا ئەگەری هەیە نیوەی كورسییەكانی بەركەوێت. 
 
لەو 18 كورسییەی پارێزگای سلێمانی كە دابەشكراوەتە سەر پێنج بازنەدا، بەپێی رێژەی دەنگی لایەنەكان لە هەڵبژاردنەكانی پێشووتر و ئەو چاوەڕوانییانەی بۆ ئێستا هەبوون، هاوپەیمانی شانسی بردنەوەی بەشی هەرە زۆری كورسییە‌كانی هەبوو، چونكە بە یەكێتی و گۆڕان 388 هەزار دەنگیان هەیە، ئەم ژمارەیە كە دابەشدەبێت بەسەر پێنج بازنەدا لە سنووری هەر بازنەیەك لە 45 تا 97 هەزار دەنگ دەوەستێت. ئەمەش بە ئەندازەیەكی زۆر زیاترە لە دەنگی ركابەرەكانی، كە دەنگی هیچ كامیان نەگەیشتووەتە 75 هەزار دەنگ لە ئاستی پارێزگا كە دابەشدەبێت بۆ پێنج بازنەكە هیچ حزبێكیان دەنگیان ناگاتە 20 هەزار دەنگ لە هیچ كام لە بازنەكان. بەڵام رەچاوی ئەوە نەكراوە بۆ نموونە لە بازنەی سێ كە پارێزگای هەڵەبجە دەگرێتەوە، یەكێتی و گۆڕان نزیكەی 45 هەزار دەنگیان لە سنووری ئەو بازنەیە هەیە، هیچ كام لە لایەنە ركابەرەكانیان لە 15 هەزار دەنگ زیاتریان نییە. هاوپەیمانی دەیتوانی بەلانی كەم و بەدڵنیاییەوە دوو كورسی لە سێ كورسی ئەو بازنەیە بەرێت، بەڵام ئێستا بە یەكێتی و گۆڕان هیچ بەربژێرێكی پیاویان دانەناوه ‌و چاویان لەوەیە كۆتای ژن بەرن. دوو كورسی موستەهەقی خۆیان جێهێشتووە بۆ كۆمەڵی ئیسلامی و یەكگرتووی ئیسلامی. 
 
لە بازنەی چوار كە سنوری پشدەر و رانیە تا دووكان دەگرێتەوە و چوار كورسی بۆ تەرخانكراوە، یەكێتی و گۆڕان 97 هەزار دەنگیان لە سنووری ئەو بازنەیە هەیە و هیچ حیزبێك رێژەی دەنگەكانی لە 20 هەزار تێپەڕ ناكات، كەواتە دەیانتوانی زۆر بە دڵنیاییەوە هەر چوار كورسییەكەی ئەو بازنەیە ببەنەوه ‌و هێشتا هەزاران دەنگیشیان زیاتر بوو. كەچی ئێستا تەنیا دوو پیاویان بەربژێر كردووە و چاویان لەوەیە كۆتایەكی ژنیش بەرن و كورسییەكیان جێهێشتووە. واتا بەشی زیاتر لە چوار كورسی دەنگیان هەبوو كەچی سێ كەسیان بەربژێر كردووە. 
 
پێچەوانەی بازنەی چوار و بازنەی سێ‌، لە بازنەی پێنجدا ناوچەكانی گەرمیان بە یەكێتی و گۆڕان 57 هەزار دەنگیان هەیە، بۆ هەر چوار كورسییەكە چوار بەربژێریان دیاریكردووە، بەڵام گومانی ئەوە دەكرێت یەكێك لە بەربژێرەكان هاوپەیمانی بكرێتە قوربانی بۆ ئەوەی بەربژێرێكی سەربەخۆ دەربچێت لە بری یەكێك لە بەربژێرەكانی هاوپەیمانی. تەماشا بكە لە بازنەیەكدا 45 هەزار دەنگیان هەیە، تەنیا یەك كەسیان بەربژێر كردووە، لە بازنەیەكی دیكەدا 55 هەزار دەنگیان هەیە چوار كەسیان بۆ بەربژێر كردووە. ئەگەر ئەمە لە چوارچێوەی ئەو لێكگەیشتنەدابێت وەك دەگوترێت لەنێوان یەكێتی و كۆمەڵ و یەكگرتوو كراوە، ئەوەی زانراویشە ئەوەیە ئەندامانی كۆمەڵ و یەكگرتوو لەو بازنانەی خۆیان بەربژێریان نییە دەنگ دەدەن بە ركابەرەكانی یەكێتی.
 
لە دوو بازنەكەی دیكەی ناو سلێمانیشدا هەست بەهەمان سیناریۆ دەكرێت بۆ ئەوەی دوو كەسی دیكە له ‌شوێنی دوو بەربژێری یەكێتی یان گۆڕان دەربچن. پێش هەر شت دەمەوێ‌ ئەوە بڵێم كە ئەوەی یەكێتی كردوویەتی، ئەگەر كورسیی خۆی كەمبێتەوە بۆ ئەو كەسانەی دیكە، ئەوە زیانە بە خودی حیزبەكەی گەیاندووه ‌و لە داهاتوودا هەست بە كاریگەرییەكانی دەكرێت.‌ ئەگەر ئەمە تاكتیكە و كردوویەتی بۆ ئەوەی بەربژێرەكانی گۆڕان بكەون و لە بری ئەوان ئەو كەسانە دەربچن كە لە دەرەوی یەكێتین، ئەوەش بێمتمانەییەكی خراپ لەنێوان یەكێتی و گۆڕان دروستدەكات و لە داهاتوودا هیچ حیزبێك متمانەی بەوە نامێنێت كە هاوپەیمانێتی لەگەڵ یەكێتی بكات. 
 
وەك لە سەرەتاوە ئاماژەم پێیدا ئەگەر كەسانی دیكە یەكێتییان بەو ئاراستەیەدا برد بێت كە لە زۆنی یەكێتی، یەكێتی هێزی تەنیا و یەكلاكەرەوە نەبێت، ئەوە دەبێت گومان بۆ ئەوە بچێت كەسانێك هەن لە بۆسەدان بۆ ئەوەی لە داهاتوودا هیچ ئەگەرێكی دڵنیایی بۆ یەكڕیزی كورد دەستەبەرنەبێت، بەردەوام گرووپێك هەبن وەك دەستكەلا بۆ رێگری لە دروستبوونی یەكگوتاریی كورد بەرامبەر بەغدا.