نەزهەت حالی
1 رۆژ پێش ئێستا
چەكدانانی پەكەكە ترسنۆكی نییە
شۆڕشگێڕی كەلە رەقی نییە
راچڵەكین-
چەكدانانی یەكەم گروپی سەركردە و گەریلاكانی پارتی كرێكارانی كوردستان هەنگاوێكی مێژووی بوو، دەستپێكی كرداری پرۆسەیەكی گرنگی چارەسەری ئاشتیانەو دیموكراسیانەی پرسی كوردە لە توركیا .
ئەو چەكدانانە تەسلیم بوون نییە، بەڵكو ئازایەتییە و بوێرییە لە تێگەیشتن لە بارودۆخی هەنوكەیی و هەوڵدانە بۆ سود وەرگرتن لەو دەرفەتەی كە هاتووەتە پێش .
بە كۆتایی هاتنی ئەو شەڕە، كورد دەتوانێت لەو پۆتانسیێلەی كە هەیە بۆ ژیانێكی باشتر و پێشكەوتن لەناو وڵاتی توركیادا سود وەربگرێت ، لەبەر ئەوەی لە ئێستادا كورد لە ڕووی ئابوری و زانستییەوە و بە نیشتەجێ بوون و تێكەڵ بوونی لە ناو شارە گەورەكانی توركیا، بە بەشداری لە كاری پەڕلەمانی بە بەراورد بە جاران لە قۆناغێكی زۆر جیاواز دایە ، كورد هێزێكی باش و كاریگەر و بەسودە لە توركیا.
توركیا دەوڵەتێكی گرنگی ناوچەكەیە و زانای بواری سیاسەت جۆرج فریدمەن پێی وایە ئەو دەوڵەتە وەكو هێزێكی گەورەی ڕۆژهەڵاتی ناوەڕاست بەدەر دەكەوێت، سەرۆك كۆماری توركیاش بە ڕاشكاوانە لە پەرتوكی جیهانێكی دادپەروەرانە مومكینە( a fairer world is possible), ڕەخنە لە سیستمی جیهانی دەگرێت و دەڵێت “لەو كاتەی جیهان ڕووبەڕوی كێشە گەورەكان دەبێتەوە،ئێمە ناتوانین چارەنوسی مرۆڤایەتی بدەینە دەستی ڕەحمەتی چەند نەتەوەیەك”ئەو چوارچێوە هزرییەی كە ئەردۆغان پێشنیار دەكات بۆ جیهان هەروەك خۆی دەڵێت، “دەبێت لەسەر ئایدیای فرە لایەنی (multilateralism-التعددیە) جێگیر بێت”.
بۆ گەیشتن بە ئاستی هێزێكی گەورەی ناوچەیی و بینینی ڕۆڵی شیاو لە ئاستی جیهانی، توركیا و سەرۆكەكەی پێویستیان بەوەیە ئەو فرەلایەنەیە لە ناو وڵاتەكەیان جێگیر بكەن، ئەوەش بە بێ گەیشتن بە ئاشتی لەگەڵ پەكەكە و واز هێنانی ئەو حزبە لە خەباتی چەكداری و پاراستنی مافی كورد بە دەستور و یاسا لە ناو توركیا ناهێتە دی.
هەروەك چۆن سەرۆك ئەردۆغان دەڵێت كە جیهان گەورەترە لە پێنج وڵات، توركیاش وەك دەوڵەت ئەگەر بیەوێت گەورەتر بێت لەوەی كە هەیە،دەبێت تەنیا توركیای خەلكی بە نەتەوە تورك نەبێت و بە كردەیی و بێ جیاوازی توركیای كوردیش بیت، كورد و نەتەوەكانیتریش وەكو توركەكان مافیان پارێزراو بێت.
پەكەكە و بە تایبەت ڕێبەری پەكەكە عەبدوڵا ئۆجەلان ، بڕیارێكی مێژوویان داو بە هەڵوەشاندنەوەی ئەو حزبە ( كە سەرەڕای رەخنەی زۆر لە شێوازی خەباتی چەكداری ڕابردووی، بەڵام ئەو پارتە ڕۆلێكی گرنگی لە كایەی سیاسی ناوچەكە هەبووە ).
لە ڕوانگەی واقع بینی و بەرژەوەندی گەلی كورد و تورك كە جەبری مێژوو و جوگرافیا قەدەرەكانینانی پێكەوە بەستووە، واز هێنان لە خەباتی چەكداری نە ترسنۆكییە نە تەسلیم بوون، بەڵكو جۆرێكە لە ئازایەتی بۆ بڕیاردانی دروست و جێبەجێ كردنی بڕیارە دروستەكە.
شۆڕشگێری كەلە ڕەقی نیە بەڵكو واقع بینی و خۆ گونجاندن و سود وەرگرتنە لەدەرفەتەكان و كەمكردنەوەی زیانەكانە، هەروەك سەرۆك كۆماری پێشوی ئێران هاشمی رەفسەنجانی لە ڕەخنە گرتنێكدا لە كەسانێك لە وڵاتی خۆیدا سەبارەت بە جیاوازی نێوان شۆڕشگێڕی و كەلە ڕەقی سیاسی زۆر بەجوانی ئاماژەی پێداوە و دەڵێت:
“ئەوانەی كە بە هەڵە كەلە ڕەقی بە شۆڕشگێڕی دەزانن هەڵەن. كەلە ڕەقی،یەك دەندەی( یك دندگی)، هەر قسەیەكمان كرد دەبێت لەسەری بین، پیاو ئەوەیە كە لە قسەكەی پاشگەز نەبێتەوە، ئەوانە هەموویان نیشانەی پاشڤەڕۆی و دەمارگیری و نەزانینن، مرۆڤی تەندروست ئەو كەسەیە لەو كاتەی زانی كە دەبێت لە ئێستادا هەڵوێستێكی نوێ وەربگرێت دەبێت بتوانێت بڕیاری خۆی بدات."
ئەوەی دیارە كە ڕێبەری زیندانی پەكەكە بڕیارێكی تەندروست و ڕاست و شۆڕشگێڕانەی لە ئێستادا داوە، بەردەوامی شەڕ تەنیا زیانی بۆ تورك و كورد هەیە، لە ئێستادا ڕۆڵی یەكلاكەرەوە بۆ توركیا دەمێنێتەوە بەوەی ئاشتی بە دەستور و یاسای سەردەمینانە و دیموكراسیانە جێگیر بكات.
پێشبینی دەكرێت دەوڵەتی ئیرانیش بیر لە هەنگاوێكی هاوشێوە بۆ چارەسەری پرسی كورد لە ئێراندا بە ڕێگای ئاشتیانە بكاتەوە. ئێمە لە هەرێمی كوردستان و عیراقیش وەكو دەسەڵات و خەڵك گرنگە هەموو پاڵپشتییەكی سەركەوتنی ئەو هەوڵە ئاشتیخوازنە بكەین.