ئەبوبەكر كاروانی
5 کاتژمێر پێش ئێستا
مەسەلەی پەیوەندی نێوان كوردو ئەمریكا هەر لە حەفتاكانی سەدەی رابردوەوە، مشت و مڕی زۆری لە نێوەندە فیكری و سیاسییە كوردییەكەدا درووست كردووە، جگە لە هەڵوێستی چەپی كوردیی، كە بەگشتیی و بۆ ماوەیەكی زۆر ئایدۆلۆژی و جەوهەر گەرابووە، بە هەورازو نشێوو قۆناغی جۆراوجۆردا تێپەریوە.كە من لێرەدا باسی ئەمە ناكەم و خواحەزكات لە وتارێكی تردا دێمەوە سەری، بەڵكو دەمەوێت سەرنج بۆ لای گرنگیی لێدوانەكانی سیناتۆری ئەمریكی (لیندسی گراهام) رابكێشم، دەربارەی پرۆژە یاسایەك دەربارەی پارێزگاریكردن لە كورد، كە بەگووتەی خۆی بەنیازە لە داهاتوودا پێشكەش بە كۆنگرێسی بكات.
گراهام پاساوی ئەم هەڵوێست و دەستپێشخەرییەی بەوە دەداتەوە كە كورد لە شەری دژ بە داعش و كۆتایهێنان بە خەلافەتەكەی هاوپەیمانێكی سەرەكیی ئەمریكا بوون، واتە رۆڵیان لاوەكی و تەواوكەر نەبووە، بەڵكو بنچینەیی و دەستنیشانكەر بووە، ئەوەش وا دەكات دەست لێبەردانیان، كار لە ناوبانگ و بەرژەوەندییە نیشتیمانییە ئەمنییەكانی ئەمریكا بكات.
بەگوێرەی لەم پێناس و وەسفەش، ئەوەی لە رۆژئاوای كوردستان و سووریا روویداوە پەلەی تێدا كراوەو بەرژەوەندییە قووڵ و دوور مەوداكانی ئەمریكای تێدا رەچاو نەكراوە. ناشبێت ببێتە رێبازو پێشینەیەكی پەیرەوكراو لەسەرئاستی خۆرهەڵاتی ناوەراست و ئەوڵاتانەی كوردیان تێدا دەژیت.
هەر بۆیە ناوبراو دەخوازێت ئەو هەڵەی لە لایەن ئیدارەی ترەمپ و كۆشكی سپییەوە كراوە، كۆنگرێس بە هەردوو حیزبەكەوە لەئاستێكیشدا بێت راستیبكەنەوە و بیكەنە دەرفەت بۆ دەركردنی یاسایەك بۆ ئەوەی مەسەلەی پەیوەندی لەگەڵ كورد لە چوارچێوەی سات و سەودای كاتی كۆشكی سپی دەربكەن و چوارچێوەیەكی یاسایی پابەندكەری بۆ ئیدارە جیاوازەكان پێ ببەخشن.
لەم چوارچێوەشدا ناوبراو بەنیازە پڕۆژە یاسایەك بخاتە بەردەم كۆنگرێس، سزای توند بەسەر هەر گروپ و حكومەتێكدا بسەپێنێت، لە كردەوەی دوژمنكارانە دژ بە كورد تێوە گلابێت. كە ئەگەر ئەم پرۆژەیاسایە سەر بگرێت، بۆ كوردو خۆرهەڵاتی ناوەراستیش دەبێتە رووداوێكی مێژوویی، چونكە لە ئاستێكیشدا بێت، هاوشێوەی یاسا پەیوەندیدارەكان بە پرسی بە دژایەتیكردنی سامی پەیوەندیدار بە جولەكەكان دەبێت.
بۆ یەكەم جاریش كورد لە رۆژهەڵاتی ناوەراستدا، لە دەرەوەی دەوڵەتەكان و سەروەریانەوە وەك نەتەوەو هێزێكی هەڕەشەلێكراوی متمانەپێكراو مەترەح دەبێت و دانی پێدا دەنرێت و بەواتایەك لەواتاكان پارێزگاریشی لێ دەكرێت، بەتایبەتیش ئەگەر تەنها قەتیس نەبێت بە سوریاو كوردی ئەو بەشەو بۆ كۆی كورد بێت لەسەر ئاستی پارچەكانی كوردستان و دنیادا.
یاسایەكی لەم جۆرە بە بڕگەو ماددەی بەهێزەو جێبەجێكەرەوە دەربچێت، لە ئاستێكیشدا بێت شوێنی بێ دەوڵەتیی بۆ كورد پڕدەكاتەوە، چونكە جۆرێك لە پارێزبەندیی پێدەبەخشێت، زەمینەش ساز دەكات بۆ ئەوەی لەداهاتوودا، كێشەی كوردو مەسەلەی كوردستان بە نێودەوڵەتی ببن ودانیان پێدا بنرێت. لە هەردەرفەتێكی هەڵكەوتووشدا، لە سەر ئاستی پارچەیەك یاخود گەورەتردا دەوڵەتی كوردستان ببێتە ئەگەرێك مێژوویی بەردەممان.
هەر بۆیە گرنگە كورد بێ دواكەوتن بێتە سەر خەت، لۆبی خۆی و دۆستەكانی بخاتە گەر بۆ پشتیوانیكردن لە دەستپێشخەرییەكەی و خاوەنەكەی و كاریگەربوون لە داڕشتنی ماددەكانی گرنگە دام و دەزگاو پارت و هێزە كوردستانییەكان بە دەركردنی بەیاننامە، پشتیوانی لە پرۆژەكە بكەن. چەندین یاداشت بەهەزاران ئیمزاوە ئاڕاستەی سەناتۆری ناوبراوو كۆنگرێس بكرێت ( هەڵبەت ئەم بەشەیان بۆ هەموو ئەو كەسانەش راستە كە پشتی كورد دەگرن و باسی دەوڵەتی كوردستانیان وروژاندووە).
لە گۆڕەپانی خۆپیشندانەكانیشەوە دەنگدانەوەی هەبێت، تێكەڵ بە درووشم و داواو بەییاننامەی خۆپیشاندەران ببێت.
بۆ ئەوەی پشتیوان بین لە رێی ئەمریكای دووەمەوە هەڵەی ئەمریكای یەكەم راستبكرێتەوەو تێبگەین لەوەی لانی كەم لەهەندێ كات ودەرفەتدا زیاد لەئەمریكایەكمان هەیە.
بەوەش جارێكیتر ئەمریكا لە سەرچاوەی حەسرەت و هەست بە بێكەسی هەندێكمانەوە بكەینەوە بە دەرفەت؟