عیماد ئەحمەد
2 کاتژمێر پێش ئێستا
راچڵەکین-
پێش هەموو شتێك، زۆر بەداخەوە ئەمڕۆ بەهۆی باری تەندروستییەوە، كاك كۆسرەت تاقەتی جارانی نەماوە كە بتوانێت وەك رابردوو لەگەڵماندا خزمەتی هەرێمی كوردستان و میللەتەكەی بكات، بە تایبەتی لەم بارودۆخە هەستیار و ترسناكەدا، بەڵام ناوی ئەو هەمیشە بە شێوەیەكی بەرز لە مێژووی تێكۆشانی گەلی كورددا ماوەتەوە و بەردەوام ورە بە ئێمە و نەوەی تازە دەدات.
كاك كۆسرەت یەكێكە لە تێكۆشەرە دیارەكانی یەكێتیی نیشتمانیی كوردستان. من یەكەمجار لە ساڵی 1984 لە كۆنفرانسی سێی كۆمەڵە لە مێرگەپان بە دیداری شاد بووم. ئەو كاتە وەك لێپرسراوی رێكخستنەكانی كۆمەڵە لە هەولێر بەشدار بوو، دیارە رۆڵێكی كاریگەری لە سەرخستنی كۆنفرانسەكەدا بینی. دواتر بوو بە یەكێك لە سەركردە دیارەكانی شۆڕش و نەگەڕایەوە بۆ شار، بەڵكوو لە ناو شۆڕشدا مایەوە و ئەركی سیاسی و سەربازیی گەورەی لەئەستۆ گرت.
لە هاوینی ساڵی 1997دا، كاتێك سەرۆكوەزیرانی زۆنی سەوز بوو، لەگەڵ كاك كۆسرەت و وەفدێك سەردانی دێهاتەكانی ناوچەی ئالانی شارباژێرمان كرد. خەڵكیی بەژن و پیاو و بە مناڵ و پیرەوە پێشوازییان لێكردین و هاواریان دەكرد: «كۆسرەت رەسولی عەلی، شێرەكەی ئیمامی عەلی»
ئەو ناو و ناوبانگە بەهۆی ئازایەتی و قارەمانێتییەكەیەوە بوو كە لە شەڕ و ئاشتیشدا نیشانی دابوو.
كاك كۆسرەت پیاوێكی قارەمان و خاوەنهەستێكی سیاسیی دەگمەن بوو. زۆرجار بڕیارەكانی راست و هەڵسەنگاندنەكانی دروست دەردەچوون. لە ناوخۆ و دەرەوەی وڵات، وەك سەرۆكی وەفد بەشداری دانیشتنە گرنگەكانی كردووە و هەمیشە داكۆكی لە مافە رەواكانی گەلی كوردستان كردووە. لە رووی كۆمەڵایەتییەوە، پیاوێكی بەوەفا و خۆشمەعشەرە. لە كاتی خۆشی و ناخۆشی هەڤاڵاندا، دریغی نەكردووە. دەستكراوە و دڵپاك بووە بۆ خزمەتی كەسوكاری شەهیدان و پێشمەرگە و تێكۆشەرە دێرینەكان.
ئەگەرچی ئەمڕۆ بەهۆی نەخۆشییەوە ناتوانێت وەك جاران رۆڵ ببینێت، بەڵام مێژووی تێكۆشان و خزمەتەكانی هەمیشە بۆ ئێمە وانەیەكە لە ئازایەتی، بەوەفایی و بەرپرسیارێتی.
ئێمەی یەكێتییەكان و هەموو ئەوانەی باوەڕمان بە رێبازی مام جەلال و یەكڕیزیی هەیە، دەبێت قۆڵی لێ هەڵبماڵین و جێگەی ئەو سەركردانە پڕبكەینەوە كە بەهۆی تەمەن، یان نەخۆشی، یان كۆچی دواییەوە، زۆر بەداخەوە لە ناوماندا نین، بەڵام ئێمە بە یادی هەڤاڵە هەمیشە لەیادەكانمان و بە هیممەت و یەكڕیزیی، دەتوانین ئاڵای یەكێتی زیاتر گەشاوەتر بكەین و خزمەتی گەل و نیشتمان بكەین، لەپێناوی ژیانێكی شایستە و سەرفرازیی زیاتر بۆ میللەتەكەمان.