شەڕە قسەی ناو میدیا نامانگەيەنێت بەھیچ

بڵێسە جەبار فرمان


5 رۆژ پێش ئێستا

بە دروستكردنی بابەتی جەدەل لەسەر قەوارەی ھەرێم و دژە ھەرێم خەڵك جەواشە مەكەن.

ھەرێمی كوردستان دەستورییە و بە كەس ھەڵناوەشێتەوە.

ھەڵوەشاندنەوەی ھەرێمی كوردستان گۆڕینی دەستور و ڕاپرسی گەرەكە، كە لەم ھەلومەرجەی عیراق پێیدا تێدەپەڕێت سەختە و بگرە مەحاڵە.

بە لێدوانی سەیرو سەمەرە لەسەر موچەو گواستنەوەی موچە بۆسەر بەغداد، خەڵكی مەخەڵەتێنن. ھەموو كەسێكی ئیداری ئەزانێت كە ئەمە مەسەلەیەكی ئیداری و میلاكاتە و ھەر فەرمانبەرێك سەر بە وەزارەتێكە و میلاكی ھەیە لەسەر وەزارەتەكەی، بۆ گواستنەوەی موچە دەبێت میلاك بگوێزرێتەوە.

واتا دەبێت میلاكی تاك بە تاكی فەرمانبەرانی ھەرێم بگوێزرێنەوە بۆ سەر وەزارەتەكانی مەركەز. ئەمەش بێجگە لەوەی گۆڕینی بەڕێوەبەرایەتییەكان دەگەیەنێت و بێ نان كردنی ئەو ھەموو فەرمانبەرانەی لە وەزارەتەكاندا كاردەكەن، ھەڵوەشاندنەوەی حكومەتی ھەرێمیش ئەگەیەنێت كە وەكو ئاماژەم پێدا ھەرێم دەستورییە و بێ گۆڕینی دەستوری عیراق و ڕاپرسی ئەمە ناكرێت.

تكایە ھاوڵاتیان بەم لێدوانانە كە ھیچ بنەمایەكی یاسایی و ئیداری نییە، سەرقاڵ مەكەن.

 یەكتری بە دژی یاسای چاكسازی تەخوین مەكەن

چاكسازی بە بڕینی نانی چەند كەسێك ناكرێت كە خێزان و مناڵیان ھەیە، چاكسازی بە شەفافیەتی داھات و گەڕانەوەی داھات بۆ خەزێنەی دەوڵەت دەكرێت.

وەرن ھەموو لایەنەكانی ھەرێم پێكەوە

بێ یەكتری تەخوین كردن بە نانیشتمانی

بێ وەڵام و وەڵامدانەوەی یەكتری

بێ تۆمەت بەخشینەوە بەیەكتری

بێ لێدوان و نوسینی نامەنتقی

بێین و بە دوای چارەسەردا بگەڕێین

با بێین و خەونی دوژمنەكانمان بە پەرتەوازەیی كورد لە گۆڕ بنێین.

با بێین و چارەسەری ریشەیی بدۆزینەوە

ھیچ سەخت نییە

ھەزار میل بە یەك ھەنگاو دەست پێدەكات

با دەست پێبكەین

ھەموو پێكەوە......